Bilang pagtalima sa layunin ng pagdiriwang ng Fire Prevention Month kung Buwan ng Marso na makalikha ng ligtas sa sunog at matibay na pamayanan, ang Bureau of Fire Protection (BFP) Laguna Provincial Office sa pamamatnubay ni FSupt. Arlene A. Balais bilang Provincial Fire Marshal at sa pangangasiwa ni FCInsp. Adrian S. Dela Cruz, City Fire Marshal ng Lungsod ng San Pablo, ay naglunsad ng “Fire Square Roadshow” sa atrium ng SM City San Pablo noong nakaraang Martes.
Ang aktibidad ay sa pakikipag-ugnayan kay Assistant Mall Manager Edessa P. Sibug, na dinaluhan nina Chief of Staff FSSupt. Shiela C. Andrade ng BFP-Region IV-A, at Provincial Disaster Risk Reduction Management Officer Aldwin M. Cejo bilang kinatawan ni Gob. Ramil L. Hernandez.
Ayon kay FSSupt. Andade, ang Fire Square Roadshow ay isang interactive o tuloy-tuloy na daloy ng impormasyon mula sa BFP patungo sa publiko upang ang mga karaniwang mamamayan ay maturuang itanim sa kanilang kaisipan ang kultura ng pagiging ligtas sa sunog.
Wastong paggamit at pangangalaga ng iba’t ibang uri ng fire extinguisher; pagkilala sa pinagmumulan ng sunog, upang mabatid ang angkop na pamamaraan upang ito ay masugpo; at maging ang mga alituntuning ipinatutupad ng pamahalaan upang ang komunidad ay magawang ligtas sa sunog, ay dapat na maging bahagi na ng kaisipan o instinct ng mga tao at ito ang pinagsikapang maitanim sa kaisipan ng mga mamamayan sa ginagawa ng Bureau of Fire Protection sa pagtataguyod ng Fire Square Roadshow, at mga fire drill.
Si FSSupt. Andrade ay natalagang San Pablo City Fire Marshal noong 2016 kung kailan kanyang ikinampanya na iwasan ang magtingi ng gasolina na nakasilid sa malalaking botelya ng soft drink, at iwasang mag-imbak ng tangke ng LPG o gas kung walang imbakan o storeroom para sa mga tangke, sapagkat iyong ay lubhang mapanganib ingatan sa hindi angkop na kaayusan. At pamilyar siya na ang pangasiwaan ng SM City San Pablo ay lubhang matulungin sa pagpapatupad ng mga palatuntunan ng Kawanihan ng Pangangalaga Laban Sa Sunog.
Ang kanyang pagdalo ay parang re-union umano nila nina Mall Manager Sibug, PR Manager Niña P. Wong at iba pang mga management staff.
ADVERTISEMENT
