ni Melainie U. Viterbo
Sa napipintong pagbabalik na pangkalahatan ng mga mag-aaral sa pampublikong paaralan ngayong Nobyembre ay tiyak aasaahan muli ang ilang kaganapan sa loob ng silid tulad ng pagsisiksikan ng mga estudyante, init o kawalan ng sapat na bentilasyon sa mga klasrum, maging ang labis na ingay na nagiging sanhi ng hindi pagkakadinig sa mga leksiyong itinuturo ng mga guro.
Maliban sa pagbibigay ng sapat na gusaling pagdarausan ng klase, isa sa nakikitang dapat bigyan ng pansin ay ang kakulangan ng mga guro sa paaralan. Marami kasing mga paaralan sa bansa na ang guro ay kasalukuyang humahawak ng 40 o higit -pang mga mag-aarala sa kanilang klase sa halip na 25:1 pupil:teacher ratio na siyang inirekomendang angkop na bilang sang-ayon sa Executive Order No. 349.
Napabalita na noon pa man na may ilan pang teaching position na hindi pa napupunan ng pamahalaan kasama na rito ang humigit kumulang sampung libong teaching items na nilikha sa ilalim ng 2022 General Appropriation Act. Kung kaya ganoon na lamang ang hinanaing ng mga aplikante sa pagkaguro at ilang grupo na nakikipaglaban sa karapat ng mga edukador. Ilan pa nga sa mga nabanggit na aplikante ang sinasabing taon na halos ang hinihintay sa pag- aaply. Dumagdag pa sa kanilang hinaing ang pagpuna nila sa ilang gurong kasalukuyang nagtuturo sa Senior High na magpasa hanggang ngayon ay hindi pa rin nakakapasa sa Licensure Exam for Teachers.
Maituturing ang pagsisiksikan ng mga mag-aaral sa klase ay isang sangkap sa kapahamakan lalo pa ngayong panhon ng pandemya na kung saan nararapat isagawa ang physical o social distancing ng bawat isa upang maiwasan ang paglaganap at pagkawaha sa nakakatakot na virus. Kaya’t harinawa’y maipagkaloob na ang mga nalalabing bakanteng aytem para na rin sa ikaka-ginhawa at ligtas ng mga klase ngayong new normal.
