ni Myda Rose P. Ocampo
Hindi makakaila ang mga benepisyong dulot ng pagkakaroon ng access sa teknolohiya hindi lamang sa ngalan ng pag-aaral ngunit maging sa araw-araw na gawain ng mga guro.
Ang paggamit ng mga kompyuter o laptops ay matuturing na pinakamainam na paraan upang mapadali ang mga gawain ng mga guro sa paaralan. Kabilang dito ang paggawa at pagpapanood ng mga powerpoint presentations, pagrerekord ng marka ng mga bata, paggawa ng samu’t-saring reports at maging ang mga online meetings at webinars na nauso nitong kasagsagan ng pandemya.
Samakatuwid, lubhang kailangan ng mga guro ang mga nasabing makabagong kagamitan o gadget upang lalo nilang mapagbuti ang mga binibigay nilang paglilingkod o serbisyo sa mas mabilis na panahon., nang sa gayon ay mailaan pa ang nalalabi nilang mga oras sa higit pang kapaki-pakinabang na gawain, partikular ang pagtuon ng pansin sa mga struggling learners at readers ng kani-kanilang klase.
Sa kabilang banda, matatandaan na nitong mga nagdaang buwan ay naiulat na nag-ilak ang Department of Education o DepEd ng halagang 2.4 billion pesos para sa proyektong pamamahagi ng laptop sa mga guro ng pampublikong paaralan. Nabanggit din na tinatayang ang budget para sa bawat isang laptop ay mahigit 32 libong piso na kalaunay naging humigi’t kumulang 58 libong piso bawat isang unit, kasama na sa nabanggit na halaga ang maintenance ng mga ito sa loob ng tatlong taon. Kung susumahin lubhang napakalaki ng halaga nito para sa aktuwal na halaga para sa isang unit. Na kung sanay maiwawasto ay mailalaan pa sana upang tugunan ang iba pang pangangailangan o suliranin ng mga paaralan.
Ganumpaman, dahil sa muling pagbubukas ng isyu ay nabigyang pansin ng mga mambabatas ang naudlot na pamamahagi ng mga nasabing laptops para sa mga guro. Sa katunayan, dito sa lalawigan ng Laguna ay umarangkada na muli ang utay-utay na laptop distribution sa mga paaralan na lubahang ikinagalak ng mga guro bagama’t hindi muna lahat ay mabibigyan.
Umaasa na sana sa darating na panahon ay magiging kabilang na sila sa mabibiyaan ng laptop na siyang magiging kasangga nila sa tuwinang pakikipagsapalaran nila bilang guro ng mkabagong panahon.