Ni: Ester G. Banaag
T3-Calauan Central ES
Calauan Sub Office
Ang Araling Panlipunan ay isa sa mga asignaturang tinuturo sa paaralan na mukhang madaling matutunan ng mga bata. Lalo na ang mga simple aralin tulad ng pagiging makabayan, pagiging maka-bansa o pagmamahal sa lupang tinubuan.
Madaling tandan ang mga aralin sa AP lalo na kung hindi ito kailangang sauluhin tulad ng mga current events at historical facts. Ang mga aralin katulad na may layuning gaya ng, maipakikita ang tamang saloobin sa wastong pangangalaga ng mga likas na yaman ng bansa, ay madaling matutunan ng mga mag-aaral, pero ang mahirap dito ay yung ipakita at gamitin ito sa totong buhay.
Madaling ipaliwanag sa mga bata ang mga epekto ng pagtatapon ng basura kung saan-saan, pero ang isapuso ito ay lubhang mahirap. Nangangailangan ito ng maraming panahon, maraming paalala at gabay upang maipakita nila sa kanilang mga kilos sa loob at labas ng paaralan ang kanilang mga natutunan.
Mahirap ding masabi na natutunan nila ang pagmahal sa bansa kung sa simpleng pagtayo sa tuwing inaawit ang Lupang Hinirang ay hindi nila magawa. Kasama na dito ang pagbigkas ng Panatang Makabayan na hindi naman nila ginagampanan sa totoong buhay.
Ilan sa mga panatang kasama doon ay, “susundin ko ang tuntunin ng paaralan”. Tunay na madaling bigkasin pero hindi lahat ay sumusunod sa mga simpleng alituntunin ng paaralan, kagaya ng pagpila sa kantina, pagsuot ng ID at pag-iwas sa pakikipag-away at iba pa.
Isa rin sa sinasaad ng Panatang Makabayan ay ang pag-aaral ng buong katapatan. Pero sa kabilang banda, hindi naman lahat ng bata ay tunay na nag-aaral ng mga aralin lalo na sa kanilang mga bahay.
Siguro bilang mga guro sa Araling Panlipunan, ating tiyakin na magagamit ng mga bata ang mga magagandang aral na hatid na asignaturang ito. Hindi lang dapat ito manatili sa kanilang mga isip, kung mas higit na maipakita ito sa kanilang mga gawa at kanilang mga puso.
Dahil ang tunay na batang Filipino ay batang maka-kalikasan, makatao, maka-Diyos at maka-bansa.
